Actividades da Campaña do Día da Muller

Compartir

Accións en Sectores Laborais Feminizados
Formación e sensibilización para profesionais do mar e a poboación en xeral

As "Mulleres e o Mar" será o eixo temático fundamental deste ano para a campaña de sensibilización con motivo do Día Internacional da Muller do Concello de Poio. Neste contexto, o CIM está a programar as seguintes actividades:

Formación e Sensibilización para Traballadoras do Mar

O marisqueo a pé é unha actividade fundamental para o desenvolvemento socioeconómico de Poio. Das 396 persoas do municipio con licenza para exercer a actividade máis do 90% son mulleres.

> Obradoiro de Prevención de Riscos Laborais no Marisqueo <

Este obradoiro realizado en colaboración co Instituto de Seguridade e Saúde Laboral de Galicia (ISSGA) busca fomentar hábitos saudables nas traballadoras e axudar a coñecer os riscos específicos da profesión para previr lesións músculo-esqueléticas frecuentes (cervicalxias, lumbalxias e dorsalxias; alteracións da/s articulación/s do ombreiro/s (tendinite, artrose, roturas, luxacións); alteracións da/s articulación/s do xeonllo/s (lesións ligamentosas, artroses, lesións de menisco); lesións do túnel carpiano; alteracións da/s articulación/s do cóbado/s (epicondilitis, epitrocleitis, artrose).

-Obxectivo: Fomentar hábitos nas destinatarias que axuden a previr lesións músculo-esqueléticas fortemente incapacitantes.

-Destinatarias: Mariscadoras a pé. 

-Data: mércores 29 de febreiro de 2012.

-Duración: 2 horas aprox. 

-Horario: tarde, 17:30 a 19:30 horas. 

-Lugar: Salón do Centro de Servizos Sociais (Casa Rosada).
-Prezo: de balde.

> Obradoiro sobre Supostos para o Abandono da Profesión: Xubilación e Axudas <

Este obradoiro realizado en colaboración coa Asociación Galega de Mariscadoras (AGAMAR) ten como obxecto informar sobre a acción protectora da Seguridade Social nos casos de abandono da profesión na idade legal de xubilación e axudas ao colectivo nos supostos de non ter dereito a pensión contributiva ou non acadar os periodos mínimos de cotización.

-Obxectivo: Proporcionar información útil e precisa sobre os supostos de abandono da profesión.

-Destinatarias: Mariscadoras a pé. 

-Data: mércores 7 de marzo de 2012.

-Duración: 2 horas aprox. 

-Horario: tarde, 17:30 a 19:30 horas. 

-Lugar: Salón do Centro de Servizos Sociais (Casa Rosada).
-Prezo: de balde.

Video-Forum "As Mulleres e o Mar"

Mércores 29 de febreiro, 2012 ás 19:30 horas

Presentación dos traballos da muller e o mar e proxección das pezas documentais dos Grupos de Acción Costeira da Ría de Vigo-A Guarda e a Ría de Pontevedra.

María Elena Herbello Puentes, Xerente do Grupo de Acción Costeira 7 Ría de Vigo-A Guarda, e Laura Nieto Zas, Xerente do Grupo de Acción Costeira 6 Ría de Pontevedra, exporán nunha mesa redonda como xurdiu a idea dos documentais, a exposición fotográfica “Un Mar de Mulleres” e a publicación do mesmo nome (Durante os veráns de 2010 e 2011 realizáronse entrevistas a mulleres que traballan en diferentes organizacións profesionais do sector pesqueiro dos Concellos das Rías de Vigo, A Guarda e Pontevedra co obxectivo de aproximarse á realidade da situación laboral destas profesionais galegas. Coa información recompilada editáronse as pezas audiovisuais que se visionarán nesta presentación).
 

O acto comezará  ás 19:30 horas no Centro de Servizos Sociais de Poio (Casa Rosada) e a él están convidados/as todos/as os/as membros das entidades representativas do sector: Confrarías e agrupacións sectoriais que queiran participar e contribuír coa súa experiencia como protagonistas destes traballos.

"Un Mar de Mulleres" -  Un documental sobre a muller do mar

Entrada libre para público xeral até completar aforo.

Exposición "Un Mar de Mulleres"

Do 17 de febreiro ao 1 de marzo, 2012

Esta exposición, elaborada polo Grupo de Acción Costeira nº 7 da Ría de Vigo-A Guarda, ten como obxectivo valorizar o traballo e imaxe da muller no mar. Recolle a historia de mulleres de diferentes Concellos que desenvolven traballos vinculados co mar: mariscadoras, lonxeiras, mariñeiras, bateeiras, redeiras, percebeiras…

Poderá visitarse:

Do 17 ao 24 de febreiro no Casal de Ferreirós.

Do 27 de febreiro ao 1 de marzo no Centro de Servizos Sociais de Poio (Casa Rosada).

Entrada libre para público xeral. 

 

Outras Actividades Socioeducativas
Accións co alumnado de ensino secundario e a poboación en xeral

Ademais destas centradas na muller do mar o CIM realizará actividades orientadas aos centros educativos do municipio e a poboación en xeral:

Campaña educativa "Tecendo Historias de Muller"

> Obradoiros Educativos co alumando de Ensino Secundario <

Obradoiros educativos para o alumnado de ensino secundario (1º da ESO) TECENDO HISTORIAS DE MULLER. Tecendo Historias de Muller é unha campaña arredor da temática de xénero enmarcada dentro dun proxecto máis amplo da Dirección Xeral de Cooperación Exterior que reflicte os proxectos de cooperación nos que están traballando as cooperantes de Solidariedade Internacional de Galicia. A través dun xogo as educadoras de Solidariedade Internacional de Galicia traballarán coas mozas e mozos do IES de POIO os ámbitos nos que a desigualdade entre mulleres e homes está presente. O xogo que se emprega deseñouse a través do traballo en xénero realizado polas cooperantes da organización en países como Bolivia, Guatemala, Palestina e Senegal e as historias de vida de mulleres e homes destinatarias/os deste traballo que se traducen en proxectos de cooperación. 

Ás mozas e mozos participantes ofréceselles a posibilidade de tomar parte nun concurso de relatos e de fotografía que teñen de fondo os temas tratados nos obradoiros. 

As historias de vida que son a base do deseño dos obradoiros educativos serán noveladas por autoras e autores galegas/os de renome xunto cos relatos e fotografías do concurso xuvenil e formarán parte dun libro que terá o título de Tecendo historias de muller. 

Estes obradoiros realizaranse na semana do 5 ao 9 de marzo.

> Teatro de Rúa "Tecendo Historias de Muller <

Teatro de rúa TECENDO HISTORIAS DE MULLER para a poboación en xeral: Tamén contaremos con Solidariedade Internacional para unha actuación-espectáculo de rúa (sketchs teatrais) titulada "TRASDELAS" sobre a situación de desigualdade á que se enfrontan as mulleres nos países empobrecidos, incidindo no compromiso adquirido polo goberno español a través dos Obxectivos do Cumio do Milenio. 

Realizarase o sábado 10 de marzo ás 12.00 horas na praza da Chouza de Combarro.

Actuación aberta a público xeral.

VIII Concurso de Redaccións "Fálanos da túa avoa"

Este concurso está dirixido ao alumnado de 1º a 4º da ESO do IES de Poio. Os premios consistirán nun ipod, nunha cámara dixital e material escolar e entregaranse o día 9 de marzo ás 20.00 horas no Centro de Servizos Sociais.

Gañadoras:

1º Premio: Paula Domínguez Gómez (Samieira).

2º Premio: Claudia Calvo Couselo (San Xoán).

3º Premio: Iria González Otero (San Xoán).